YouTube dagi “Prezident blogerlari” kanalida joylashtirilgan lavhalarga rasmiy munosabat

Videolavhalarda goʻyoki bir tadbirkorning buzilgan huquqini himoya qilishga kelgan “bloger”ni "Oʻzmilliybank" AJ rahbariyati bankka kiritmagani hamda Fargʻona viloyati, Soʻx tumanida istirohat bogʻini barpo etayotgan tadbirkorga Bank tomonidan koʻmak koʻrsatilmayotgani boʻyicha eʼtiroz bildirib, “NBU bankda muammo” va “Vazirlar Mahkamasida” deb nomlangan video murojaatlar joylangan.

Bildirilgan eʼtirozlar boʻyicha "Oʻzmilliybank" AJ tomonidan quyidagilar maʼlum qilinadi.

“Oʻzmilliybank” AJ Bosh ofisi binosi alohida qoʻriqlanadigan bino(obyekt)lar toifasida boʻlganligi sababli, tadbirkor bilan birga kelgan, oʻzini korxona yuristi deb tanishtirgan, biroq buni tasdiqlovchi hujjatlari (buyruq, ishonchnoma va boshqalar)ni taqdim etmagan, 3-shaxs boʻlgan YouTube ijtimoiy tarmogʻidagi “Prezident blogerlari” deb nomlangan kanali vakilining shaxsiy qabulda ishtirok etishi “Bank siri toʻgʻrisida”gi Qonunga muvofiq rad etildi.

Shuningdek, shu kuni Bank rahbariyati “AKRA” reyting agentligi bilan boʻlib oʻtadigan uchrashuvda ishtirok etishi zarurligi sababli, Tadbirkorning shaxsiy qabuli bankning ushbu masalaga masʼul tarkibiy tuzilma rahbarlari ishtirokida tashkil etildi.

Davlat rahbarining 2018-yil iyunda Fargʻona viloyatiga tashrifi davomida oʻtkazilgan yigʻilish bayoniga muvofiq, Soʻx tumanida “Istirohat bogʻi” barpo etish, qulay biznes muhitini yaratib berish maqsadida korxona rahbari (Rasulov Ilxom) arizasiga asosan, "Oʻzmilliybank" AJ tomonidan 10-yil muddatga yillik 7 foizdan kredit mablagʻlari ajratib berilgan va loyiha ishga tushirilib, topshiriq toʻliq bajarilgan.

Soʻx tumanida qurilgan istirohat bogʻi qurilishi boshlanishi va olib borilishi jarayonlari, ishga tushguncha qadar muddat davomida bank rahbari, uning oʻrinbosarlari hamda tegishli departamentlar xodimlari doimiy ravishda Soʻx tumaniga xizmat safarlariga chiqqan holda ish holati bilan tanishib, aniqlangan kamchiliklarni joyida hal qilish choralari koʻrib borilgan.

Bundan tashqari, Istirohat bogʻi qurilishi davomida "Oʻzmilliybank" AJ tomonidan tadbirkorga ushbu biznesni yoʻlga qoʻyish borasida koʻmak berilib, kredit qarzdorligini bir necha marotaba kechiktirib toʻlashga imkon berilgan.

Biroq, berilgan imkoniyatlar va yozma ogohlantirishlarga qaramasdan, “Istirohat bogʻi” faoliyati samarali va qonunchilik talablariga mos holda yuritilmaganligi oqibatida kredit mablagʻlari qaytarilmaganligi sababli, Bank tomonidan kredit qarzdorliklarini undirish boʻyicha sudga murojaat etishga majbur boʻlingan.

Qoʻqon tumanlararo iqtisodiy sudining 2021-yil 25-martdagi hal qiluv qaroriga asosan tadbirkor tomonidan uzoq muddat davomida toʻlanmay kelgan kredit qarzdorligini qaytarish belgilanib, qarzdorlikni garov mulklari hisobidan undirish boʻyicha majburiy ijro harakatlari boshlangan.

Shu sababli, Rasulov Ilxom tomonidan “Istirohat bogʻi”ni qayta baholagan holda bank balansiga topshirish orqali Qoʻqon shahridagi boshqa likvid mulklarni qonunga zid ravishda garovdan chiqarishni rejalashtirilgan.

Ushbu maqsadni amalga oshirish uchun oʻzining 72 yoshli onasi M. Mahkamovani qarzdor korxona rahbarligiga rasmiylashtirib, YouTube tarmogʻidagi “Prezident blogerlari” kanali vakilini ushbu masalaga jalb qilgan.

Videomurojaatda Soʻx tumanida istirohat bogʻini qurgan tadbirkor 72 yoshli onaxon deb aytib oʻtilgan, aslida istirohat bogʻini qurish uchun bankdan kredit olgan vaqtda korxona rahbari, ushbu onaxonning oʻgʻli boʻlgan.

Korxona yangi rahbari M. Mahkamova Sud qarori asosida taqdim qilingan ijro varaqasiga asosan, Majburiy ijro byurosi tomonidan ijro ishi qoʻzgʻatilib, majburiy ijro harakatlari olib borish jarayonida, qarzdor korxonani toʻlovga qobiliyatsiz deb topish toʻgʻrisida sud ajrimini chiqarishga erishgan.

Holat boʻyicha bugungi kunda Sud tugatish boshqaruvchisi tomonidan jamiyatga tegishli boʻlgan barcha mol-mulklar qayta baholanmasdan, birgina kredit mablagʻlari hisobiga Soʻx tumanida qurilgan istirohat bogʻi bozor bahosidan yuqori qiymatda qayta baholanib, tegishli tashkilotlar xulosasi olinmagan.

Yuqoridagi holatlar boʻyicha korxona rahbari tomonidan berilgan savollar hamda toʻlovga qobiliyatsizlik doirasida tugatish boshqaruvchisi tomonidan olib borilayotgan harakatlari toʻgʻrisida amaldagi qonunchilik talablari doirasida batafsil tushuntirishlar berildi.

"Oʻzmilliybank" AJ Bosh ofisi binosida bank rahbariyati ishtirokida tadbirkor (M. Mahkamova) va YouTube ijtimoiy tarmogʻidagi “Prezident blogerlari” deb nomlangan kanali vakili O. Tuxtanazarov bir necha marotaba qabul qilinib, shaxsiy qabullar oʻtkazilgan va qabullar davomida ular tomonidan koʻtarilgan barcha savollarga asoslantirilgan javoblar va takliflar berilgan.

Qabullar davomida korxonaga ajratilgan kreditlar taʼminoti sifatida taqdim etilgan Qoʻqon shahridagi likvid garov mulklarini taʼqiqdan ozod qilib, Soʻx tumanida qurilgan “Istirohat bogʻi”ni amaldagi qonunchilik talablariga zid ravishda qayta baholab, qarzdorlik hisobiga bank balansiga qabul qilish borasida qilgan murojaatiga Bank masʼullari tomonidan ushbu holatlar qonunchilik talablariga mos kelmasligi yuzasidan huquqiy tushuntirishlar berilgan.

Biroq, berilgan javoblar hamda bank rahbariyati tomonidan bildirilgan takliflar korxona rahbari yoki uning masʼul xodimlari tomonidan bajarilmasdan, faqatgina bank rahbariyatiga qayta-qayta murojaat qilish bilan cheklanib qolinmoqda.

Murojaatchining shu masala yuzasidan yangi takliflarini koʻrib chiqishga tayyorligimizni bildiramiz.

“Oʻzmilliybank” AJ

Matbuot xizmati