O'zlashtirilgan investitsiyalar hajmi 10,8 foizga o'sdi

Vazirlik va idoralar,  xo'jalik birlashmalari va mahalliy ijro etuvchi hokimiyat organlari rahbarlari  ishtirokida bo'lib o'tgan  hukumat yig'ilishida sanoat tarmoqlarini modernizatsiyalash, texnik va texnologik jihatdan yangilash dasturlari  ko'rib chiqildi.

Xususan, ushbu dasturlar doirasida  2014 yilga mo'ljallangan muhim obyektlarini foydalanishga topshirish ishlarining holati har tomonlama  tahlil qilindi.  Majlisda berilgan ma'lumotlarga ko'ra,  amalga oshirilayotgan faol investitsiya siyosati natijasida  shu yilning birinchi yarmida  o'zlashtirilgan investitsiyalar hajmi 10,8 foizga, shu jumladan, to'g'ridan-to'g'ri xorijiy investitsiyalar  28,8 foizga  ko'paydi.  2014 yilning   Investitsiya dasturiga kiritilgan  umumiy qiymati 680 million AQSh dollariga  teng  64 ta loyiha  tugallandi.  Mazkur loyihalarning samarasi o'laroq,  joylarda  1651 ta yangi ishlab chiqarish obyekti foydalanishga topshirildi.

Yig'ilishda yangi yuqori texnologik ishlab chiqarish obyektlarini  tashkil etish, korxonalarni modernizatsiyalash, texnik va texnologik jihatdan qayta jihozlash, infratuzilma va ijtimoiy soha obyektlarini qurish va rekonstruksiya qilish bo'yicha investitsiya loyihalari  jadallashtirishni ta'minlaydigan amaliy chora-tadbirlar ko'rish zarurligi ta'kidlandi.  Shuningdek,   2015 yil uchun  Investitsiya dasturini ishlab chiqish, uni respublika hududlarini, iqtisodiyot tarmoqlari va sohalarini rivojlantirish bo'yicha qabul qilingan o'rta muddatli kompleks dasturlar bilan o'zaro bog'liqligini  ta'minlash yuzasidan  tashkiliy chora-tadbirlar belgilandi.