Shu yilning 9 oyida davlat byudjeti 0,1 foiz profitsit bilan ijro etildi

Yig'ilishda ta'kidlanganidek, iqtisodiyotimiz tarmoq va sohalarida  o'rta muddatli rivojlantirish dasturlarini davom ettirish natijasida,  asosiy makroiqtisodiy ko'rsatkichlarning ijobiy o'sish sur'atlari taminlanib, bu  iqtisodiyotning barcha soha va tarmoqlarini yanada muvozanatli rivojlantirish uchun mustahkam asos yaratdi. Jumladan, shu  yilniig 9 oyida  yalpi ichki mahsuloti 8,1 foizga, sanoat mahsulotlari ishlab chiqarish hajmi  8,4 foizga oshdi.

- Parlamentning asosiy vazifalaridan biri Davlat byudjetini qabul qilish,  uning ijrosini  nazorat qilish hisoblanadi. Ayni shu ma'noda, Qonunchilik palatasida  bugun asosiy moliyaviy hujjatning 9 oydagi  ijrosini muhokama qildik, -  deydi Oliy Majlis Qonunchilik palatasi  deptutati Nasimjon Alimov. – Unda  ma'lum bo'lishicha, Davlat byudjetining daromadlar va xarajatlar qismi belgilab berilgan paramentlar asosida bajarilgan.

Shuningdek,  hisobot davrida   markazlashgan investitsiyalarning maqsadli yo'naltirilishiga erishildi.  Xususan, investitsiyalar hisobidan   1 trln. 183 mlrd. so'm miqdoridagi mablag'lar mamlakatda  tadbirkorlik uchun yanada qulayliklar yaratish,  ishbilarmonlik muhitini yaxshilash chora tadbirlariga yo'naltirildi, deya ta'kidlaydi  Nasimjon Alimov.  

Tahlil qilinayotgan davrda mashinasozlik va metallni qayta ishlash sohalarida  114,2 foiz , qurilish materiallari sanoatida  113 foiz, yengil sanoatda 115,9 foiz,  qora metallurgiya sanoatida  113,4 foiz, oziq-ovqat sanoatida esa  109,7 foizlik  barqaror o'sishi ta'minlangan. Davlat byudjeti yalpi ichki mahsulotga nisabatan 0,1 foiz  profitsit bilan ijro etilgan. Yig'ilishda hisobot davrida Davlat byudjetining xarajat qismida asosiy e'tibor uning ijtimoiy yo'naltirilganligiga, ya'ni ta'lim, sog'liqni saqlash, aholini maqsadli ijtimoiy        qo'llab-quvvatlash,  byudjet mablag'larining g'azna ijrosini ta'minlash, ularning samaradorligini oshirishga qaratilganligi alohida e'tirof etildi.

Yuqoridagilar bilan bir qatorda, hisobot davrida ayrim byudjet muassasalarida mablag'larning maqsadsiz sarflanishiga, ularning noqonuniy ishlatilishi bilan bog'liq moliyaviy huquqbuzarliklarga yo'l qo'yilayotganligi  deputatlar tomonidan tanqid ostiga olindi. Ushbu masala yuzasidan  tegishli vazirlik va idoralar vakillarining axborotlari tinglandi. Bahs-munozaralarda deputatlar byudjet mablag'laridan samarali foydalanish hamda joylarda qonunlar ijrosini to'liq ta'minlash bo'yicha amaliy takliflar bildirishdi.

UzReport